المفاهيم المعكوسة ..!

الخميس 12 فبراير, 2009 عند 8:45 م | أرسلت فى المفاهيم المغلوطة, حقن عامة | أضف تعليق
الأوسمة: , , , , , , , , , , ,

من العمليات المعروفة و المعتادة .. التعرض بكثرة لمؤثر ما .. مما يؤدي الى تقليل النفور منه .. ثم اعتياده .. ثم انضمامه الى خلفية الادراك و الوعي كشيء طبيعي موجود و غير ملفت للانتباه بالمرة ..

شيء جميل كلنا عارفينه .. لكن اللى مش واضح للاسف .. هو خطورة العملية دي على المجتمع .. سواء كانت تتم بطرق متعمدة عن طريق الانظمة او وسائل الاعلام .. او بدون وعي و بين الناس و بعضها .. زي التعود على الالفاظ البذيئة و التلميحات الجنسية فى الكلام .. للدرجة اللى بقت فيها بعض الكلمات شديدة البذاءة و القبح .. تستخدم بدون غضاضة للتعبير عن معنى تانى بريء .. وكان اختلاف القصد او النية يفرق .. بغض النظر عن قبح اللفظ و بذاءته

و الخطورة مش فى التعود فقط .. الامر وصل الى انقلاب المفاهيم تماما .. زي مثلا موضوع الغش .. دلوقت المراقب اللى مش بيسمح بالغش و مش بيساعد الطلبة بقى شخص سيء و معقد و مش بيحب الخير للناس .. بينما الشخص اللى بيسيب اللجنة و يساعد الطلبة على الغش و يخلي واحد مذاكر زي واحد مش مذاكر فى النتيجة .. ده شخص ابن حلال و طيب و قلبه على الطلبة و اولياء الامور اللى تعبانين معاهم ..

و كأنه مش سبب من اسباب الانهيار و البطالة و قلة الكفاءة و الظلم اللى ماليين المجتمع و مرجعينه لورا ..

و نفس الموضنع ينطبق على المصالح الحكومية .. ادارة مرور المنطقة الفلانية دي زي الفل .. ليه ؟ عشان كل حاجة بتمشي بالفلوس من غير تعقيد .. ادفع تطلع من المشكلة او تاخد حق غيرك او اي حاجة انت عاوزها .. مدير الهيئة دي راجل محترم و خدوم .. بيجامل الكل و يريح الكل و يتساهل مع الموظفين و يسدي خدمات و خيره على الكل .. بغض النظر عن القوانين اللى بتنظم العمل و حرمانية اللى هو بيعمله و اذيته لناس تانية لما يتجاوز النظام و يقدم ناس على غيرها او يسيب موظف مش بيأدي وظيفته .. و كلها مصالح .. و شيلني و اشيلك ..

و كله كوم .. و الكذب كوم تاني .. كانت صدمتي شديدة لما كنت بتناقش مع صديق ليا و قلتله ( هتكذب ؟ ) قالى عادي ما احنا بنكذب على طول و في حاجات كتير ..

للاسف هو كان معاه حق في جزء من كلامه .. ان الكذب بقى شيء معتاد .. اسهل شيء للخروج من اي ورطة و عشان تكون الحياة بالجمال اللى انت عاوزه .. انك تكذب بكل بساطة .. حتى لو مش محتاج الكذب و لو الصدق مش هيضرك .. بس الكذب اريح .. و اسهل ..

التعود .. التعود .. الاباحية في كل حتة .. افلام .. اغاني .. مسلسلات .. اعلانات .. قصص .. لبس .. خلاص .. بقت معتاده .. لما حد يتكلم عن عدم تقبله او رفضه لفيلم او قصة .. اصبح شخص متخلف و رجعي و مقيد للحريات .. و الاسواء هو ربط المفاهيم الدينية بالتخلف و الرجعية و عدم مواكبة العصر ..

الاعتراض على لبس معين هو تقييد لحرية المراة .. الاعتراض على الاختلاط هو زيادة في الكبت و عدم مواكبة للعصر .. حتى موقف حصل معايا قريب جدا ..  اعلاني اني كرهت لعبة معينة عشان فيها خنزير .. بقى موقف متخلف و متعصب و يعبر عن تفكير رجعي .. !

انا كرهت الخنزير لاسباب دينية بحتة .. صحيح اللعبة مفيهاش الاضرار دي و ملهاش علاقة بالخنزير الحقيقي .. بس انا مش بحب الخنزير اساسا عشان كده مش بحب اللعبة .. مش معنى كده اني بقول ان اللعبة حرام مثلا .. زيي زي اي حد تاني .. واحد مش بيحب العربيات .. مثلا .. يبقى كراهيته لالعاب السباقات دليل على تعصبه و تخلفه ؟

بس للأسف ( بالمنطق المعكوس ) اي حاجة لها علاقة بالدين دلوقت بقت تخلف و رجعية .. مع العلم ان لو فكرنا بمنطق الدين فى كل حاجة من الحاجات دي هنلاقيه هو الاصوب و الاصح و الاكثر مواكبة للعصر و لاحتياجات الانسان بصفة عامة ..

الخالق هو الله .. و الدين من عند الله .. و الله هو الاكثر علما بعباده و ما يناسبهم .. ومن رحمته عز و جل انه انزل الينا الرسل و علمنا الدين اللى فيه الاسلوب الامثل للحياة .. لان الله ادرى بخلقه من انفسهم ..

للأسف .. المجتمع محتاج اعادة ضبط للمفاهيم .. بس اذاي ؟

اللى يعرف .. يقولي

Advertisements

اكتب تعليقُا »

RSS feed for comments on this post. TrackBack URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

المدونة لدى وردبرس.كوم.
Entries و تعليقات feeds.