الدستور .. و الأخبار المستفزة !

الأربعاء 26 نوفمبر, 2008 عند 8:29 ص | أرسلت فى حقن عامة | أضف تعليق
الأوسمة: , , , , , , , , , , ,

لثاني مرة .. يدفعني خبر من اخبار جريدة الدستور للتعليق عليه فى هذه المدونة ..

هذه المرة اقصد هذا الخبر :

حالات إغماء وهياج عصبي بين طلاب وطالبات مدارس المنيا عقب حصولهم علي تطعيم الحصبة الألماني

تأملوا معي العنوان الضخم .. ” حالات ” و ” هياج عصبي ” و ” طلاب و طالبات مدارس المنيا ” .. كلام يوحي ان محافظة المنيا شهدت مأساه عنيفة .. بينما الخبر نفسه بيقول ايه ؟

ثلاث طالبات اصبن بالأغماء .. و طالب هاج و حاول القفز من على سور المدرسة .. دي حقيقة الخبر .. طب تعالوا كده نبص للحقائق دي ..و هتكلم بصفتي في المجال و في وزارة الصحة و شايف الحملة بنفسي من الداخل من خلال عملي في وحدة صحية في قرية صغيرة ..

حالات الاغماء عند البنات متكررة و عادية جدا و البنات بتفوق تلقائيا او بعد تعليق محلول جلوكوز عادي .. عشان لو فيه هبوط مثلا .. مع الاخذ في الاعتبار ان الهبوط ده ملوش اي علاقة طبية بالتطعيم .. غير الخوف او العامل النفسي عند البنات .. بالاضافة الى ان كتير من البنات في سن المراهقة و غير سن المراهقة بيعانوا من انخفاض ضغط الدم و سهولة حدوث هبوط ..

ادي مشكلة الاغماءات .. و حقيقي .. ثلاث بنات فقط في محافظة كاملة .. ده رقم قليل جدا لو اخدنا في الاعتبار العامل النفسي ..

اما الطالب اللى جاتله حالة ” هياج عصبي ” و حاول ينط من على السور .. حقيقي انا مش فاهم ذكاء الناس اللى نقلت الخبر ده .. و مش فاهم ذكاء الشخص اللى كتبه .. الحقنة بتتاخد تحت الجلد .. اولا لو المادة لها اي تأثير على الجهاز العصبي محتاجة وقت عشان تتنقل و توصل للجهاز العصبي ده لو عدت ال حاجز بين الدم و الجهاز العصبي المركزي اصلا .. و ده مش بيحصل .. و ثانيا .. الحقنة الواحدة بيتم تعبئتها من فيال .. يحتوي على المادة الفعالة ( اللقاح ) بعد اذابتها .. يعني بياخد منها اكتر من شخص .. و لو فيها حاجة مضرة .. هتصيب كل اللي ياخد من الفيال مش هتختار واحد بس و تأثر عليه ..

ده غير ان اي طالب اساسا مش محتاج هياج عصبي عشان ينط من على السور .. و الا تبقى كل الساندوتشات اللى انا كنت باكلها في المدرسة مليانة تطعيم حصبة فاسد بيجيب هياج عصبي ..

و بصفة عامة الحالة الوحيدة اللي تخوف – لو الشخص معندوش موانع زي العلاج بالكورتيزون او حالات الكانسر او الادوية المثبطة للمناعة – ان يكون الشخص ده بالذات عنده حساسية لمادة من المواد اللي موجوده في التطعيم .. و دي نادرة طبعا و انا مسمعتش عن حالة حساسية واحدة لغاية دلوقت .. خصوصا و ان اغلب الناس اخدوا تطعيم الحصبة ده في سن صغير  ..

السؤال اللى انا عاوز اطرحه بقى ..

هنستفاد ايه لما نخوف الناس من التطعيم ده ؟؟

 ولا هي مجرد فرقعة كذابة و خلاص ؟؟ و لا هو تشكيك في اي حاجة حكومية من غير تمييز ؟؟ .. انا عن نفسي اخر شخص ممكن يعجبه حال البلد او الحكومة .. مش معنى كده اني افبرك عناوين و ابالغ في نقل حوادث بسيطة و شكك في نظام التطعيم و اخوف الناس من غير اي فايدة ..

يا اهل الصحافة .. راعوا ضمائركم بالله عليكم .. كده الواحد مش هيثق فى اي خبر و لا هيصدق اي معلومة تتقال في البلد دي  ..

Advertisements

اكتب تعليقُا »

RSS feed for comments on this post. TrackBack URI

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

أنشئ موقعاً أو مدونة مجانية على ووردبريس دوت كوم..
Entries و تعليقات feeds.