غزو صيني من نوع جديد .. في عقر دارنا

الأحد 11 مايو, 2008 عند 1:19 م | أرسلت فى حقن عامة | 3 تعليقات

كلنا نعرف الغزو الصيني عن طريق السلع الرخيصة من اول اقلام الرصاص و لعب الاطفال و الملابس لغاية السيارات و الموتوسيكلات و من قطع السباكة و الكهرباء للكمبيوترات و الموبايلات .. كل ده فهمناه واتعودنا عليه و عرفنا اد ايه دي ناس بتشتغل بجد و بتغزو العالم .. ايه الجديد بقى ؟؟

الجديد بالنسبالى انا على الاقل .. ان الصين بقت مش بتصدر للعالم منتجات و بس .. دي بقت بتصدر عمالة .. بتصدر بني ادمين ..

منظر بدأنا نتعود عليه اليومين دول .. شاب و شابة صينيين شايلين شنط مليانة ملابس – مثلا – و بيلفوا طول النهار ..

زمان كانت الملامح الشرق اسيوية مرتبطة عندنا بالماليزيين و بالازهر .. دلوقت بقى فيه باعة متجولين صينيين معاهم منتجات متنوعة و بأسعار كويسة .. الذ حاجة بقى اللى خلتني اكتب الموضوع ده .. اني شوفت حلاق صيني متجول .. !!!!!!!!!!!

حلاق ؟؟ .. شنطة شيك فيها العدة بتاعته كاملة و المراية و مش عارف ايه .. و في المدخل او البلكونة و الحلاقة بـ 3 جنيه بس !

سبحان الله .. عندنا شباب عاطل بالهبل و كله عاوز يمشي و يسيب البلد و يشتغل بره .. بينما الصينيين جايين يشتغلوا عندنا بياعين شنطة و حلاقين متجولين ! و جايبين معاهم اولادهم كمان .. و ساكنين فى اي حتة .. بس فى الغالب بيكونو مجموعة .. و قمة فى النظام .. كل واحد بينزل مع مراته و يسيب اولاده فى البيت و واحدة بس هى اللى تقعد بالاطفال كلهم و تطبخ للمجموعة .. و تاني يوم تنزل و واحدة تانية تقعد بالاطفال .. !

ناس بتفكر و تجتهد و تعمل اللى عليها .. عشان تعيش و خلاص .. مش بيعقدوا نفسهم و لا يصعبوا حياتهم .. لو احنا نفهم كده .. ان الحياة صعبة و معقدة بما يكفي و مش ناقصة تعقيدات .. و نعيش بأبسط الطرق .. مكنش يبقى فيه ازمة بطالة و لا عنوسة و لا تأخر سن الزواج و لا ناس بتموت و هي بتحاول تسيب البلد !

بس يا تري نجاح العالم الصينيين ده .. سببه ايه ؟ انهم بس حاولوا و نجحوا ؟ .. و لا عشان احنا شعب طيب بيحب الوجوه الاجنبية فا بنشتري منهم و نخليهم يقصولنا شعرنا ؟ .. و لا عشان بيلاقوا تسهيلات من بلدهم انهم يشوفوا حياتهم بره البلد ؟ .. و لا عشان بيلاقوا تسهيلات في مصر و الدنيا مش بتتقفل في وشهم بميت قفل و ترباس زي اي شاب مصري بيحاول يشق طريقه بنفسه ؟؟

يا تري ايه السبب ؟

Advertisements

3 تعليقات »

RSS feed for comments on this post. TrackBack URI

  1. تحية طيبة
    علشان تبيع كويس لازم تصنع منتج مطلوب فى السوق وعلشان تحدد المنتج المطلوب لازم تعمل دراسة للسوق وأعتقد أن هؤلاء لهم اهداف أخرى غير عملية البيع وهو دراسة احتياجات السوق المصرى من خلال الاطلاع عن قرب عن نمط حياتنا وتفكيرنا وثقافتنا الشرائية وغير ذلك
    والله اعلم

  2. الغريبه إني سمعت من اكثر من واحد انهم بيشتروا الحجات دي من العتبه و مناطق تانيه و يبيعوها على انهم جايبنها مهاعم من الصين، والي مخليني مش مستبعد كدا ان كل واحد لو جاب معاه حجات هيجيب قد ايه يعني و هيبيع بقد ايه أعتقد لو بيجيب من بلد فعلا هتقف عليه بخساره فمش بعيد يكونوا بيعملوا كدا

    أعتقد هم بيستغلوا سذاجة الشعب المصري لأنهم بالنسبة لنا عالم ثاني يعني في تطور اكثر من عندنا فهم بيستغلوا الفجوة الثقافية و الفكريه و كمان أهم حاجه عقدة الخواجه

    🙂

    هو الموضوع عادي جدا ، لأنها في الأول و الآخر تجارة

    بس بصراحة لو فيها نصب دا إلي فعلا بيغيظني

    و شكرا على البوست الجميل دا

  3. حسام :
    اعترف ان موضوع الدراسة هذا لم يخطر ببالى .. خطر لي انهم يحاولون التغلب على التضخم السكاني و البطالة عن طريق المساعدة فى الهجرة و التوطين فى بلاد اخرى .. لكن موضوع الدراسة ده وارد جدا .. اشكرك على التعليق

    د.محمد :
    اذيك يا دكترة اخبارك ايه .. ايه المفجأة الجملية دي ؟
    عندك حق طبعا انهم مش بيجيبوا الحاجات معاهم .. بس ده ميمنعش انهم يشتغلو كموزعين للسلع المستوردة من الصين .. و عن سذاجة التعامل مع الاجانب .. حدث عن الشعب المصري و لا حرج .. شكرا يا محمد على التعليق


اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

أنشئ موقعاً أو مدونة مجانية على ووردبريس دوت كوم..
Entries و تعليقات feeds.