اصبحت اتعجب الان ممن لازال يتعجب عندما يرى موقفا يعكس انعدام الضمير او تدهور الاخلاق فى المجتمع !

في الواقع و من خلال تجربتي البسيطة التي مازالت في اولها لمواجة الحياة .. تيقنت تماما من ان كل ما تعلمه لك الحياة العملية الان فاسد و ينافي كل القيم و المباديء البسيطة التي اصطلح عليها البشر دون – حتى – وحي من السماء !

و العمق الحالي للمشكلة ليس بلا سبب .. الاسر الفقيرة اصبحت غير قادرة على مواجهة الحياة ، و بتالي يلجأ الاهل الى دفع ابنائهم الي الشارع ليتعاملون مع المجتمع .. فماذا يتعلمون ؟؟

الكذب و النفاق و المداهنة و الالحاح و انتهاذ الفرص بلا هدف سوي تحقيق الغاية مهما كانت الوسيلة .. و يفقدون احترام الذات و الاخرين و يتعلمون ان الكرامة للقوي او الغني او ذا النفوذ !

و تدور الدائرة و يتزوج هؤلاء لينجبون ابناء يلقون بهم الى الشارع .. لم اكن اتوقع ان نموذج الرجل الذي يكسب من حرفته ليصرف على نفسه و – دماغه – و يترك زوجته اولاده بلا اي رعاية او انفاق سواء طعام او دواء – لم اكن اتخيل انه موجود بتلك الكثرة ! .. لكنني الان غير متعجب .

و عندما تبحث عن الجريمة و المتهم .. لا تجد كيان واحد او سبب واحد او جريمة واحدة محددة .. و السبب ببساطة انهم بالملايين .. و ان الاغلبية – سواء بأختيارها او رغما عنها بسبب الظروف – اصبحت تتعامل بمنطق المنفعة و الانانية و اي حاجة تقدر تطولها (( اهبشها )) .. بالضبط زي القطة بتاعة الشارع و القطة المتربية !

لما تدور وشك تلاقي حد بيسرقك .. تتهمه هو لواحده ؟ ولا اللى معرفش يربيه ؟ و اللى موفرلوش الاكل و الدوا ؟

لما البلد او المؤسسات المختلفة توفر ادوية غالية لناس مش محتاجاها و يروحو يبيعوها اقل من تمنها – لانهم هم كمان محتاجين فلوس – و فيه غيرهم مش لاقيين قرص واحد متوقفه عليه حياتهم ؟ تلوم الناس و لا الشركات و لا البلد و لا مين ؟

لما واحد – زيي – يشتغل فى منطقة شعبية و يرفض يبيع الادوية اللى بيساء استخدامها او السرنجات اللى بتنضرب بيها البودرة فا يواجه جميع انواع الاهانة ثم التهديد ثم التحرش الفعلي العنيف عشان يبطل ( غلاسة ) و دي لفظة محترمة جدا بالنسبة للي بيتقال ! .. نلوم الصيع دول و لا اهاليهم و الا اللى باعلهم قبل كده الهباب ده ولا المسؤل عن تفشي التعاطي بدون اي تدخل امني فى بعض الاماكن الشعبية لدرجة ان اللى بيتعاطى ممكن يضرب ابرة فى الجنينة او قدام القسم !

لما تبقي البنت متعرفش يعني ايه احترام او خجل او اخلاق اساسا ! نلوم مين ؟

 ببساطة .. لا تعليم و لا توعية و لا تربية .. و لا فلوس و لا سكن و لا شغل .. و لا اكل و لا شرب و لا دوا .. !

عاوزين ايه من الناس ؟

من موقعي كصيدلي في صيدلية اهلية فى منطقة ما بالقاهرة .. الاحظ :

- تسيب امني فظيع .. يظهر بوضوح فى تفشي التعاطي عن طريق الحقن فى اماكن عامة و قريبة من قسم الشرطة .

- تلوث المياه .. زيادة ملحوظة في حالات الاسهال و النزلات المعوية و التيفويد … بالاضافة لحالات الحساسية الصدرية التي مازالت فى تزايد مستمر مع الوقت نتيجة لتلوث الهواء

- عدم تافر السلع الاساسية المدعومة بالقدر الكافي لتغطية احتياجات البسطاء .. و عجز فى الخدمات الطبية و عدم توافر لبن الاطفال المدعم مما يؤدي الى اساءة استخدامه .. و يوجه كثيرا لأشخاص لا يحتاجونه و يمنع عن اخرين فى امس الحاجة اليه

- دواء مدعوم او مجاني بكميات كبيرة و من نوعيات غالية احيانا .. يتوافر لدي اشخاص لا يحتاجونه و يبيعونه بأسعار اقل كثيرا من قيمته .. و كثيرا ما يزج باطفال فى هذه العملية و يدخلون فى مساومات او تعاملات غير شريفة بالمرة و لا تصلح ابدا لينشأ بها مواطن صالح !

- غلاء مستمر و جائر فى اسعار الدواء و ارتفاع في اسعار الادوية المصرية تحديدا ليقارب اسعار الشركات الاجنبية التي يرضيها بلا شك ان تقضي هذه الارتفاعات على المنافسة المحلية و نسمح بمزيد من الزيادة و الكسب لمنتجاتهم .

- ارتفاع عام فى اسعار كل شيء و هبوط فى جودة كل شيء دون اي رقابة او معايير جودة على اي شيء من اي نوع !

- نسبة كبيرة من الاطفال من مختلف الاقاليم تعمل فى حرف متنوعة و لا تحظي بأي رعاية او تعليم !

- اشتعال المنافسة فى مجالي – الصيدلية – على مستوي الصيدلي و الطبيب و شركات الدواء و وصولها الى مستوي غير اخلاقي بالمرة و الضحية الوحيدة هي المريض .. و ما اكثر المرض هذه الايام فلا يخرج تقريبا اي شخص من هذه اللعبة !

 هذا ما احببت تسجيله الان كمجرد ملاحظات ضاقت بها نفسي و خواطر خنقتني .. و لا استطيع ان اخرج من ذهني صورة لمجموعة محدودة من الاشخاص اراها (( مسؤلة )) بشكل او بأخر عن كل هذا .. و اتمنى من الله ان يهدي كل (( مسؤل )) عن ما نحن فيه عله يقوم بأي خطوة ايجابية ترحم و لو طفل واحد من الانضمام الى دائرة الانحطاط المستمر !

و ربنا يرحمني و و يرحمنا جميعا ..

 دائما عندما تثار قضية الهجرة فى الافلام و المسلسلات و البرامج  تجد رد الفعل الوطني المثالي و هو : “ بلدك اولى بيك “

من الناحية النظرية فالجملة صحيحة تماما و لكن .. بغض النظر عن الاجواء الدرامية المصاحبة .. هل فكر احد في حقيقة الامر ؟ هل حقا من البطولة و الوطنية ان تتمسك بتراب بلدك و تكافح فيه حتى و لو داست عليك الظروف و طحنتك البطالة و الاقتصاد و الاستغلال و غلاء الاسعار ؟

الاغراء قوي هنا اني اتكلم على التعديلات الدستورية الاقتصادية و اللى حسيت و انا بقرأ نصها اول مره و احاول افهم النتايج المترتبة عليها ان البلد سابت الشعب مع نفسه و خلعت ايديها من المسؤلية عن عامة الشعب الفقراء او متوسطين الحال ! بس مش هتكلم .. انا هتكلم من الناحية التانية .. ناحية الشاب اللى متخرج حديث و عاوز يشتغل مثلا .. ( عقبال ما اتخرج يا رب .. قولوا آمين ) .. رغم اني فعليا مبدأتش حياتي العملية اطلاقا و لا خطيت اي خطوة .. بس في الكام يوم اللى فاتو شوفت ناس بدأت تخطي .. و حسيت بالاحباط و الفشل .. استغلال .. و تعب و غربة عن الاسره .. بهدلة و مواقف غريبة و صعبة .. و مع مين .. مع واحد صيدلي  ( صديق ) .. و في الاخر بياخد كام ؟ على 12 ساعة في اليوم ..شغل و تعامل مع مواقف ما يعلم بيها الا ربنا .. و غربة و سكن بالتبادل على السراير .. و مفيش اكل غير الحاجات السريعة او اللى جاية من البيت قبل السفر .. و يومين راحة كل اسبوعين ! .. بلاش اقول الرقم احسن ..

 و اصحاب العمل .. قمة الاستغلال و المادية .. و طبعا مفيش داعي نتكلم عن الضمير .. ده عملة منقرضة اليومين دول .. و على الجانب الاخر .. التعيين و الوظايف الحكومية .. على سبيل المثال صيدلية الوحدة اللى هتكون منتتظراني او المستشفى العام .. يا ترى المرتب هيكون كام ؟ .. خريجي الطب بياخدوا كام ؟ النباطشي اللى بيقف 36 ساعة متواصلة بياخد كام ؟

 قصاد ده كله ؟ و تقولي بلدك اولى بيك ؟ لو كنت ابن مليونير كنت اقولك ماشي .. بلدي اولى بيا .. لكن اللى عاوز يبدأ من الصفر ؟

 لا يا عم .. عن نفسي .. انا عاوز اسافر ..

 بالتأكيد مش طول العمر و بالتأكيد مش سنين كتيرة .. كل واحد و ظروفه و مجاله .. على الاقل لغاية ما يكون اللى يقدر يبدأ بيه حياته فعلا في بلده .. انا مش من الناس اللى بتروح بال20 سنة او طول العمر  و كان مش كفاية اللى اتعمل .. رغم ان الناس دي ممكن تبقى مش طماعة .. ممكن تبقى قمة التضحية لو هي بتهلك نفسها عشان ولادها .. مهو اللى بيبدأ من الصفر و بيتمرمط .. بيصعب عليه اولاده .. و بيبقى عاوز يضمنلهم مستقبل احسن من مستقبله .. 

ها .. دلوقتي بقى المهم .. حد له عندي فرصة سفر ؟؟

20 يونيو 2007

أضغط علي الصور لمشاهدتها بحجم اكبر

امتحان مادة الـ Promotion & Marketing تحريري .. و شفوي .. و اخر يوم رسمي للفرقة الرابعة بكلية الصيدلة جامعة طنطا .. صحيح ان لسة فيه حاجات بتتسلم تبع المواد و تبع الاوراق و كده .. و صحيح انا لسة عندي يوم 3 / 7 مادة من السنة اللي فاتت مكنتش نجحت فيها .. لكن ده مينفيش اني حسيت اني بودع الكلية اليوم ده !

كويس انهم فضلوا مأخرينا لغاية الساعة 5 او 6 .. صور كتير اتصورناها اليوم ده ! فيه ناس كان نفسي اتصور معاها و مجتش فرصة .. زي علاء ابو شادي .. اللى ( كلمة حق ) كان بيعمل معايا الواجب قبل الامتحانات و يعرفني اللى علينا و اللى مش علينا و هنذاكر ايه .. مهو انا ببقى فى الطراوة طول الترم .. و فيه ناس اتصورت معاها صور لطيفة .. باذن الله هتبقى موجوده و تفكرني بالايام دي دايما .. صحيح انا معرفتش استغل ايام الكلية دي صح .. بس الحمد لله على كل حال ..

و طبعا كان فيه صور مع رفاق الكفاح عبر 5 سنين .. محمد معدي و محمد الجندي و مجدي ممدوح – ربنا يعينه – و مش كده و بس و بعد ما مشينا دبسنا معدي ( انا اللى دبسته فى الواقع ) في عزومة على الغدا .. قبل ما نرجع على البيت عندي .. و نقعد نشوف هنعمل ايه بقي فى البحث و نلعب فيفا شوية و ننقل الصور من الموبايل للجهاز .. هتوحشوني يا ولاد اللذينة .. و هتوحشني ايام القرف و البهدلة فى الكلية .. و التيرمات اللى فيها عشر مواد .. و الادوات اللى بتتكسر و الضفادع اللى مش بترضى تموت و الفران اللى بتقف على رجلين اتنين بس و حمض الكبريتيك اللى بيضرب من الانبوبة فى وش اي حد و الحنفيات البايظة و المعيدين الرخمين و الميعدين الطيبين .. و الدكاترة .. و ما ادراك ما الدكاترة ..

 صيدلة طنطا .. وداعا !!