عني

بسم الله الرحمن الرحيم

قديما .. من كام سنة بس يعني .. كان كل شخص بيحب يتكلم عن نفسه .. و خاصة على الانتر نت .. المكان اللى يقدر يظهر فيه مميزاته و يمارس جانبه المشرق بحرية .. و يقدر يخفي فيه عيوبه تماما .. لغاية ما طلع واحد عبقري .. و قال انه مش هيتكلم عن نفسه لان كل الناس بتحب تتكلم عن نفسها و ترضي غرورها و الخ الخ .. و بعدين بقت كل الناس بتقول كده .. و بعض العباقرة توصولوا الى حقيقة ان الانسان لو مش سياسي او رياضي او فنان مشهور يبقى الناس مش هتهم اوي تعرف عنه – كلمة عباقرة ليست سخرية بالمناسبة – و البعض تجاوزوا للمصارحة ببعض العيوب فى شخصياتهم من باب الصراحة و الواقعية ..

لو بتمل انزل اقرا اخر سطرين و خلاص

 مقدمة مملة .. لا داعي لها .. لكنها محاولة اخري للتظاهر بالعبقرية و الفهم .. المشكلة ان كل الناس عارفين – غالبا – معظم الحقائق .. بس عدد قليل هو اللى بيعرف يرتب الحقائق دي و عدد اقل هو اللى بيعبر عنها ببراعة .. عشان بقية الناس تعجب بيه و بعبقريته فى التوصل للحقائق اللى هي فيهم اصلا و هم عايشينها ..

هل ما سبقى يكفي لأعطاء فكره عني ؟ .. ربما بعض التعقيد و المبالغة فى الافكار .. حقيقي .. لكن اللى يهمني اكتر اني اقوله تحت عنوان ( عني ) اني مريت بمراحل غريبة في حياتي .. مش راضي عن اي مرحلة فيهم .. و في نفس الوقت عارف انا في كل مرحلة كنت بعمل كده ليه و شايفه شيء منطقي .. انا ممكن اكون ظلمت نفسي كتير .. و اكيد ظلمت ناس تانية معايا .. بس متعمدش ابدا اي اذي لأي حد .. و اتمنى ان اي حد ضايقته يسامحني و اتمنى ان ربنا يغفر لي كل اللى اخطات فيه بغير قصد ..انا بتعلم .. و بظني اني بنضج بالتدريج و هفضل انضج و اتعلم اكتر و اكتر لغاية ما اموت .. الامر مش مرتبط بسن .. الاهم اني اتمنى ان فعلا اكون دايما انهارده احسن من امبارح .. كل انسان له بيت و اسره و ظروف و مجتمع و بلد و دين و افكار بينشأ فيها .. ملوش يد في كل ده .. بس اللى له يد فيه .. اذاي اتعامل معاها .. و اذاي اتعلم و اختار طريقه .. و في النهاية الناس بتحكم على الشخص من تصرفاته و بتعرف شخصيته هو ..بغض النظر عن اي حاجة تانية ..و انا بتمنى برضه اكون عرفت اختار .. لو معرفتش اتمنى اني اقدر اصلح نفسي دائما للأفضل .

ايه الكلام الممل ده كله .. خلاصة الموضوع .. اني محمد حسن .. معرفش ليه الفلسفة ..و اني ماشي في العشرينات  و اني متخرج من كلية الصيدلة جامعة طنطا 2007 و اني تايه فى رحلة البحث عن المستقبل .. دعواتكم معانا .