صيدلي صغير ؟ ملكش عيشة في البلد دي .. !
الثلاثاء 29 سبتمبر, 2009 at 9:58 ص | In حقن سامة, حقن عامة, حقن للصيادلة | 10 CommentsTags: 40 متر, قرار, قرار اعدام الصيادلة الصغار, لا تقل عن 40 متر, مساحة الصيدلية, وزير الصحة, القرار 380, زيادة مساحة الصيدلية
قرار وزير الصحة رقم ( 380 ) لسنة 2009 بإعادة تنظيم الاشتراطات الصحية للمؤسسات الصيدلية .. !
أحتوى هذا القرار على التعديلات الجديدة في الاشتراطات التي يجب تواجدها لمنح الترخيص بفتح صيدلية .. و التى تمثل ضربة قاصمة لأي افكار ببدء مشروع صيدلية لدي اي صيدلي صغير .. و تعد وسيلة طرد مثالية توجه الصيادلة امثالى الى العمل بالخارج فى ظل تحطم اي امل في امتلاك صيدلية خاصة و بناء الحياة و المستقبل داخل الوطن بدلا من الغربة ..
هذا بالطبع للقادرين على فتح صيدلية بأقل الامكانيات .. و هو الامر الذي لم يعد خيارا متاحا الان فى ظل التعديلات الجديدة .. شملت هذه التعديلات ما يلي :
- للحفاظ على درجة الحرارة في الصيدلية يجب تركيب مؤشرات في اماكن ظاهرة و على الصيدلي ان يقرأ هذه المؤشرات باستمرار مسجلا درجاتها .. و يجب الا تزيد درجة الحرارة على 30 درجة .. يعني من الاخر كل صيدية لازم يبقى فيها تكييف ..
- تخصيص مكان مناسب بالصيدلية لمناقشة المريض فى سرية حول الامور المتعلقة بالمرض او الدواء .. يعني مثلا قسم مغلق في الصيدلية على جنب عشان نفهم فيه المريض و نشرحله المرض او خواص العلاج و كيفية استخدامه ..
- يجب وجود جهاز كمبيوتر متصل بشبكة الانترنت في الصيدلية و يحتوي على برنامج لمتابعة و تسجيل حركة الاصناف فى الصيدلية
- و اخيرا المفجأة و الصدمة الكبيرة .. مساحة الصيدلية اصبحت 40 متر الزاميا .. بعد ما كانت متقلش عن 25 متر .. بقت متقلش عن 40 متر .. !
دلوقتى تخيلوا معي صيدلية في قرية ريفية بسيطة مثلا .. لازم تبقى مساحتها 40 متر و فيها تكييف و كمبيوتر متصل بالانتر نت و قسم خاص للحديث السري بين المريض و الصيدلي .. !
ال 40 متر دول مش كل الصيدليات محتاجاهم .. و مفيش صيدلية فيها كل الادوية اللى فى السوق .. و كل صيدلية بتبقى على حسب المنطقة اللى هي فيها ..
اساسا مكان مساحته اربعين متر فى منطقة راقية و ينفع يبقى صيدلية .. ايجاره يبقى كام ؟ و لو تمليك يبقى كام ؟
انا كنت متردد من فترة و عمال ادور بقالى اكتر من 6 شهور على مكان 25 متر عادي افتحه صيدلية او صيدلية قديمة للايجار .. دلوقت خلاص .. لا بديل عن السفر .. و شكرا يا عم الوزير و شكرا يا مصر و اشوف وشك بخير بقى .. !
و هنيئا لكل الصيادلة الكبار و الاغنياء و كل المجموعات الصيدلية الاحتكارية و كل الجزارين و البوابين و التجار اللى هيشتروا اسماء صيادلة بفلوسهم و يفتحوا بيهم صيدليات مساحتها 40 متر و مكيفة و زي الفل .. !
تعليقات »
خلاصة "RSS" للتعليقات على هذه التدوينة. عنوان التتبع
أضف تعليق
-
أخر التعليقات
المدونة لدى WordPress.com. | Theme: Pool by Borja Fernandez.
Entries and comments feeds.
معتطب والصيدليات اقديمة الي متنطبقش عليها الشروط دي هتقفل مثلا؟
Comment بواسطة over dose — الثلاثاء 29 سبتمبر, 2009 #
أنا شايفلها بصراحة جانب إيجابي يا محمد..انت اعتراضك على انك ازاي توفر امكانات زي دي وبعضها تعجيزي زي المساحة..بس انت مشفتش في أماكن – زي اكتوبر مثلا – الصيدليات عاملة ازاي..بس أنا شايف ان حكاية المكان المخصص لسرية المرضى صح ما لم يسيء الناس استخدامه..معتقدش انها حاجة ممتعة ان راجل يدخل صيدلية وقدام البشر اللي هناك ويسأله عن “دوا الفياجرا بيشتغل ازاي”..الشرط فعلا المفحم هو الأربعين متر على نظام ملاعب الكورة..
تحياتي..
Comment بواسطة 3bd el rahman — الأربعاء 30 سبتمبر, 2009 #
اوفر دوز .. شكرا للمرور و التعليق .. الصيدليات القديمة زي ما هي طالما لم يسقط ترخيصها ..
عبد الرحمن .. منور المدونة
كام صيدلية فى اكتوبر مساحتها 40 متر ؟
كام صيدلية فى مصر مساحتها 40 متر ؟
و ايه فايدة 40 متر فى صيدلية صغيرة او في قرية مثلا .. الشريحة العظمى من الصيادلة صيدلياتهم صغيرة الى متوسطة .. نسبة صغيرة جدا هي الصيدليات الكبيرة .. القرار ده ذبح فعلا لأي صيدلي صغير عاوز يفتح صيدلية .. اللى هيفتح الاغنياء او اصحاب السلاسل .. او نضطر نخالف قسم الصيادلة و ندي اسامينا لجزارين و بوابين بقى .. !
انت حصل قدامك قبل كده حد دخل و سأل بالطريقة دي ؟
السرية ممكن تتوافر من غير الزام الصيدلية بمساحة و شكل معين للسرية دي .. احنا شغالين و عارفين الامور ماشية ازاي .. الناس اللى ورا القرار ده منزلوش الشارع و مشافوش صيدليات صغيرة و محتكوش بالمجتمع للأسف .. !
مجرد اهتمام بالمظهر و تقليد من غير تفكير ..
Comment بواسطة mhsn_10 — الأربعاء 30 سبتمبر, 2009 #
يبني العزيز أنا معاك تماما في حكاية الأربعين متر إلا لو هيتعمل في الصيدلية دورة رمضانية دي تبقى حاجة تانية
الموقف اللي حكيتهولك ده حصل فعلا بس مكانش نفس الدوا..
المدونة منورة بأصحابها يا ولدي..
Comment بواسطة 3bd el rahman — الأربعاء 30 سبتمبر, 2009 #
اللى بتقول عليه ده بقى سوء تصرف من الشخص نفسه .. يعني لو المكاتن مزود باوضة للسرية برضه هيدخل يعلي صوته
انا فاهم انك متفق معايا معلش اصل القرار فاقع مرارتي جامد .. و يا رب اشوفك هنا على طول
Comment بواسطة mhsn_10 — الخميس 1 أكتوبر, 2009 #
السلام عليكم
أنت اتكلمت عن الهجرة, وشايفاه أسلم وأصوب قرار, أنا لو كنت ولد كنت هاجرت من انهاردة, كل الي اخدو قرار البقاء في مصر ندموا, Go on وتوكل على الله
Comment بواسطة dconans1 — الخميس 1 أكتوبر, 2009 #
اهلا يا سارة منورة
في ناس فضلت فى مصر و ربنا وفقها و نجحت .. وفيه ناس كتير بتفضل تندم على عدم السفر من باب الشماعة اللى بيروحولها كل ما يقابلهم صعوبة و فشل يعني .. مش قاعدة يعني كل اللى سافروا نجحو و كل اللى قعدوا فشلو .. الفكرة الاهم هنا – من وجهة نظري – الظروف الشخصية لكل واحد ..
انا موضوع السفر بانسبالى صعب عشان انا الكبير و عندي مسؤليات تجاه الاسرة و كده .. لكن دلوقت حتى مع الظروف دي مفيش اي بديل فعلا عن السفر ..
المفروض البلد تساع الناس اللى مش عاوزة او مش قادرة تسافر لكن اللى بيحصل العكس .. كل يوم تزيد عوامل الطرد و يزيد الفصل بين الطبقات .. و تزيد عملية الغاء الهوية و الانتماء و تحويل التفكير للمصالح و المادة و خلاص ..
ربنا يتولانا برحمته بقى .. !
Comment بواسطة mhsn_10 — الخميس 1 أكتوبر, 2009 #
ربنا يوفقك يا محمد وتاخد القرار الأصوب
Comment بواسطة dconans1 — الأثنين 5 أكتوبر, 2009 #
السلام عليكم
40 متر وتكييف
علشان راحتكم انتم الصيادلة
هم يبكي وهم يدحك
حتقول ايه
لكن القرارات دي بتتنفذ ولا مجرد كلام
Comment بواسطة سما — الأحد 18 أكتوبر, 2009 #
و عليكم السلام و رحمة الله و بركاته ..
شكرا للمرور و التعليق ..
انا سألت فى ادارة الصيدلة من اسبوع تقريبا لما كنت هناك .. و اتقالي ان القرار ده بقى واقع فعلا و دخل حيز التنفيذ ..
Comment بواسطة mhsn_10 — الثلاثاء 20 أكتوبر, 2009 #